СтартАп-ын САХИУСАН ТЭНГЭР-үүд

Библи-д нэг ийм ишлэл байдаг.

Ганцаараа байснаас хоёул байх нь илүү дээр билээ. Тэгвэл тэдний зүтгэл сайнаар хариулагдах болно. Хэрэв тэд хамтдаа ойчих аваас нэг нь нөгөөгөө босгоно. Харин ганцаар байгч унахад түүнийг босгох хүн үгүй тул, хөөрхий. Түүнчлэн хэрэв хоёул хамт хэвтэх аваас тэд дулаацдаг бол харин ганцаараа хэрхэн дулаацах билээ? Ганц хүнийг хэн нэг нь дайран дийлж чадах бол хоёр нь нэгийг няцаана. Гурамсалж гөрсөн сур тийм ч амар тасардаггүй.Номлогчийн үгс 4:9-12

Миний бие библийг өсвөр насандаа 5 ч удаа бүтэн уншиж дуусгасан юм. Тухайн үед Христийн сүмд явдаг байсан юм л даа. Ихэнх хүн “Шинэ гэрээ” буюу Есүс Христийн төрснөөс дараах үйл явдлууд гардаг хэсгийг уншдаг бол би эсрэгээрээ “Хуучин гэрээ” тэр дундаа Израйлийн хаадын тухай, тэдний бичсэн ухаарлын номуудыг унших дуртай байсан.

Хэдий миний бие Христ итгэлтэй биш болоод ихээхэн удаж байгаа хэдий ч тэр дундаас амьдралдаа авч үлдсэн зүйлс дурдвал олон бий.

Өнөөдрийн нийтлэлээрээ уншигч та бүхэнтэйгээ өөрийн эхлүүлсэн старт-ап болох Blindcare бүтцийн талаар, мөн хэн хэн чухам ямар нөлөө үзүүлж, нэг баг болж байгаа тухай хуваалцахаар шийдлээ. Тэд бүгд стартАп-ын маань САХИУСАН ТЭНГЭР-үүд маргаангүй мөн билээ.

1. Б.Ууганцэцэг & Сэтгэл судлалын үндэсний төв

Монголдоо анхдагч Сэтгэл судлалын төвийн үүсгэн байгуулагч Б.Ууганцэцэг бол манай стартапын хамтран үүсгэн байгуулагч билээ.

Бид хамтдаа Сэтгэл судлалын салбарт түүчээ болсон олон шийдлүүдийг хөгжүүлж байгаа бөгөөд энэ замд мэргэжлийн үүднээс зөвлөн чиглүүлж, салбарын мэргэжилтнүүдийг уриалан нэгтгэж, олон нийтэд мэргэжилтний үүднээс таниулан сурталчилахад хамтран үүсгэн байгуулагчийн маань оролцоо тун их юм.

Цаашид ч сэтгэл судлалын салбарт урт хугацаандаа стартапаа төлөөлөн нөлөөлөл үзүүлж, мэргэжил нэгтнүүддээ дутагдаж буй шийдлүүдийг нэвтрүүлэхэд түлхэц үзүүлсээр байх болно.

2. Э.Цогт & Procraft agency

Хэдхэн жилийн өмнө Монгол мэргэжилтэн UX/UI дизайны шийдлийг гаргаж чадахгүй гэдэг яриа ам дамждаг байсан. Гэтэл өнөөдөр энэ яриа ор мөргүй алга болж, түүгээр ч зогсохгүй Монгол дизайнерууд олон улсын төслүүдийг гүйцэтгээд эхэлжээ.

Энэ амжилтанд гол нөлөө үзүүлсэн баг хамт олон бол яалтчгүй Procraft agency юм.

Манай хамтран үүсгэн байгуулагч Э.Цогт нь Procraft agency-г мөн хамтран үүсгэн байгуулсан бөгөөд энэхүү салбартаа манлайлал үзүүлж буй хүлээн зөвшөөрөгдсөн мэргэжилтэн юм.

Blindcare аппликэйшн UX/UI тал дээр гарч ирсэн цагаасаа амжилттай байсны ард хамтран үүсгэн байгуулагч маань байгаа бөгөөд дараа дараачийн олон шинэлэг шийдлүүдийг гардан гүйцэтгэсээр байх болно.

3. Mstars HUB

М-Си-Эс групп Технологийн старт-ап ертөнцөд хүч түрэн орж ирсэн бөгөөд Мстарс ХАБ-г байгуулж, анхны төгсөлтөө хийсэн нь саяхан.

Blindcare стартАп маань энэхүү хурдасгуур хөтөлбөрөөр дамжин амжилттай төгссөн бөгөөд компанийн маань хөрөнгө оруулалт, хууль эрх зүй зэрэг чухал хэсгүүдэд Мстарс ХАБ оролцоотой байдаг.

Цаашид дотоодын болон гадаадын хөрөнгө оруулагчдаас шат шатны хөрөнгө оруулалт татах, харилцаа холбоогоо тэлэхэд тэдний оролцоо чухал нөлөөтэй юм.

4. IO Tech

Технологийн старт-апд хөгжүүлэлтийн багийн оролцоо голлох үүргийг гүйцэтгэдэг.

Blindcare стартап-т маань Монголдоо аппликэйшн хөгжүүлэлтээрээ тэргүүлэгч IO Tech компани САХИУСАН ТЭНГЭР болж технологийн хөрөнгө оруулалт хийж буй бөгөөд, тасралтгүй найдвартай хөгжүүлэлт, чадварлаг боловсон хүчин нийлүүлэлт, шинэлэг технологийн шийдлүүдээрээ чухал нөлөөг үзүүлж эхлээд байна.

СтартАпын эхлэлийн энэ шатанд тэдний дэмжлэг асар их ач холбогдолтой гэдгийг дахин дурдах нь зөв байх.

Урт хугацаандаа бидний түншлэл олон амжилтуудыг бүтээнэ гэдэгт итгэлтэй байна.

5. Хамт олон

Батжа миний бие өөрийн хуримтлуулсан туршлагаараа компанийн гүйцэтгэл, төлөвлөлтийг удирдаж буй бөгөөд, хамтран үүсгэн байгуулагч Цолмон маань R&D буюу гол хөгжүүлэлтийн шийдлүүдийг боловсруулж байна. Бидний ард санхүү, судалгаа хөгжүүлэлт чиглэлээр ажиллаж буй чадварлаг залуус бий.

Blindcare стартап дээр бүрдээд буй энэ нэгдэл урт хугацааны амжилтыг бий болгох төгс хамтрал гэж миний бие харж байгаа бөгөөд одоо зөвхөн өмнөх ажлуудаа хийх л үлдлээ.

Илүү сайхан нийгмийг бүтээхийн төлөө нэгдсэн бүх САХИУСАН ТЭНГЭР-үүддээ амжилт хүсье. Батжа-с нь