Хамтдаа ТУЗ /Төлөөлөн удирдах зөвлөл/ хуралд оролцоцгооё

Хавар цаг ирж, 4 дүгээр сар дундаа оржээ. 4 дүгээр сар ихэнх хүний хувьд хаврын ид эморол дээрээ явж байдаг бол бизнес эрхлэгчдийн хувьд 1 улирлын ТУЗ хурал явагддаг гэдгээрээ хоногшсон байдаг.

Өнөөдөр хамтдаа нэг менежментийн баг болж ТУЗ хуралд оролцоцгооё.

Та манай багт аль албан тушаалд томилогдож хуралд оролцох хүсэлтэй байгаагаа сэтгэгдлээр үлдээгээрэй. Мөн өөрийн ур чадвар, ажлын туршлагаасаа хуваалцаарай. /CEO, CFO, CTO, CIO, CMO, COO гэх мэт/

Юун түрүүнд ТУЗ гэж чухам ямар үүрэгтэй оршин тогтдог бүтэц вэ гэдгийг мэдэж авцгаая.

Компанид засаглал гэж байдаг бөлгөө. Засаглал нь дараах алтан гурвалжинд захирагдана.

1. Хувьцаа эзэмшигч – Компанийн дүрэм дээр нэрээ бичүүлсэн болон хувьцаа эзэмшиж байгаа хувь хүн эсвэл хуулийн этгээдүүд

2. ТУЗ /Төлөөлөн удирдах зөвлөл/ – Хувьцаа эзэмшигчдийн хурлаар тэднийг төлөөлөн ажиллахаар сонгогдсон туршлага, чадвар хуримтлуулсан 3 болон түүнээс дээш тооны хүмүүс

3. Удирдлага – ТУЗ-с томилсон Гүйцэтгэх захирал, зарим тохиолдолд нэмэлтээр Санхүү эрхэлсэн захирал болон бусад албан тушаалтнууд

Товчхон дүгнэвэл компани байгуулсан эсвэл хувьцаа эзэмшиж байгаа өмчлөгч нар өөрсдийн төлөөллийг сонгож, компанийн төсөв төлөвлөгөөг батлан, хяналт тавьж гүйцэтгэх удирдлагыг сонгох чөлөөлөх эрх үүргийг олгосон бүлгийг ТУЗ гээд байгаа юм. ТУЗ маань харин энэ компанийг шударга бөгөөд үр өгөөжтэйгөөр ажиллуулахаар томилсон хүнийг ГЗ буюу CEO гээд л байгаа юм л даа.За би ингэж томъёолов 🙂

Ийм учраас ГЗ маань ТУЗ-даа тайлагнаад, дүгнүүлээд байгаа юм.

07:00 цаг

– Бүтэн сар нойроо хасан бэлдсэн ТУЗ тайлангаа танилцуулах өдөр. Эртлэн босоод ариун цэврээ сахиж аваад, цайны ганц хоёр хослолоосоо сонгож өмсөөд, зангиагаа зүүгээд, үнэртнээ цацаад л гарна даа. /Хэдий стартАп байлаа ч албаны дүр төрх үүсгэх нь дээр гэж зөвлөмөөр байна. Аливаа зүйлд тогтсон хэм хэмжээ гэж байдаг шүү дээ./

08:00 цаг

– Хурал болох газрын ойролцоо менежмент багаараа цуглаад дахин нэг яриа болон танилцуулгатайгаа танилцаад ганц ганц кофе хувааж уунгаа асуулт хариулт болон гол гаргаж авах гэсэн үр дүнгээ хэрхэн тайлбарлах гээд л стратеги дээрээ санал солилцоод авна.

08:50 цаг

– Хурал эхлэхээс 10 минутын өмнө бүх бэлтгэлээ хангаад танилцуулгаа дэлгэц дээр гаргасан байх хэрэгтэй. Тэгээд амьсгаа аваад, үүссэн байж болох зарим нэг сандралаа дараад аваарай.

Мөн ТУЗ хурлын протокол хөтлөх нарийн бичиг байхгүй бол тусгайлан сайн бичдэг эсвэл шивдэг нэгнээ энэ үүрэгт ажилд томилохоо мартав.

09:00 цаг

– ТУЗ гишүүд бүгд цугласан тул цаг бол алт гэдэг зарчмаа баримтлаад шууд тайландаа ороорой.

Нэмээд хэлэхэд тайлан тань аль болох гол үзүүлэлтүүд рүүгээ чиглэсэн товч байх нь хэн хэнийхээ цагийг хэмнэнэ гэдгийг анхаараарай. Олон л слайдтай бол сайн тайлан гэж бодож болохгүй шүү.

Тайлангийн ерөнхий бүтцээ дараах байдлаар гаргаарай.

1. Оршил, менежментийн багтайгаа ирсэн бол багаа танилцуулахаа мартав /1 слайд/
2. ТУЗ үүрэг даалгавар, түүний биелэлт /1-5 слайд/
3. Санхүүгийн үзүүлэлтүүд /5-15 слайд/
4. Борлуулалтын үр дүнгийн тайлан /2-4 слайд/
5. Үйл ажиллагааны тайлан /2-4 слайд/
6. Маркетингийн тайлан /1-3 слайд/
7. Програм, дэд бүтэц хөгжүүлэлтийн тайлан /1-3 слайд/
8. Хүний нөөцийн тайлан /1-3 слайд/
9. Дараа улирлын төлөвлөгөө, зорилт, стратеги /2-4 слайд/
10. Шийдвэрлүүлэх асуудлууд /1-2 слайд/

Таны тайлан дундажаар 30 минут болон түүнээс дээшээ ихдээ 10-15 минут сунахад яг л гоё болно. Гол хэсэг нь санхүүгийн үзүүлэлтүүд шүү. Тиймээс санхүүгийн тайлангаа нягт нямбай бэлтгээрэй. Санхүү эрхэлсэн захирал, санхүүгийн шинжээчид алдааг тань өлгөөд л гаргаад ирнэ.

09:35 цаг

Таны тайланг ТУЗ гишүүд мөн танай Менежментийн багын гишүүд бүгд сонсож дууслаа. Одоо асуулт хариултын цаг.

ТУЗ гишүүд ээлж дараалан асуултуудаа нэг дор асуух болно. Та тэмдэглэж аваад 10 орчим асуултыг нэг багц болгон базаад хариулаад яваарай.

Хариултыг та зөвхөн өгөх албагүй бөгөөд танай менежментийг багын тухайлан хариуцсан албан тушаалтан таниас илүү мэдээлэлтэй байгаа бол тэр хүнээрээ хариултыг өгүүлсэн нь зөв шүү.

10:10 цаг

Асуулт хариулт ойролцоогоор 30 минутаас 1 цагийн хооронд өрнөнө. Үүний дараа ТУЗ гишүүд бүгд компанийн тайлан болон асуудал, боломжуудыг нэгд нэгэнгүй мэдэж авсан байх бөгөөд одоо гишүүд нэг болгон өөрсдийн дүгнэлтээ хэлж, үүрэг даалгавар өгнө.

Үүрэг даалгавар болгоныг тэмдэглэж аваад танай менежментийг баг тухайн даалгаврыг биелүүлэхээр ирэх улирлын турш үндсэн төлөвлөгөөний хажуугаар нэмэлтээр ажиллах хэрэгтэй. Тэгээд энэхүү үүрэг даалгаврын биелэлтээ дараагийн улирлын ТУЗ дээр танилцуулах юм шүү.

За ингээд л болоо.

Танай баг төсөвт жилийнхээ эхний улирлыг төлөвлөгөөндөө хүрээд, эсвэл давуулан биелүүлсэн бол магтаалыг хүртэнэ. Үгүй бол мэдээж зэмлэлийг сонсоно.

Миний туршлагаар ТУЗ хурал хэзээ ч толгой илсэн уур амьсгал доор болдоггүй бөгөөд шударга бөгөөд хатуу, зарчим ч байдлаар үргэлжилдэг тул та өөрийн болон багийн сэтгэл зүйгээ сайтар бэлтгээрэй гэж зөвлөе.Гашуун туршлагаасаа зөвлөлөө 🙂

ТУЗ хурлаас менежментийг багаараа ямар ч үр дүн, магтаал эсвэл зэмлэлтэй гарч ирсэн багийн лидер CEO та хамт олныхоо урам зориг, эрч хүчийг барьж явах хүн гэдгээ санаад ТЭНГЭР шиг байгаарай.

Зэмлүүлж муулуулсан бол тэрийг нь эрч хүчээ болгоод хамтдаа хичээе гээд урмаар тэтгээгээрэй. Магтуулж гарсан бол илүү амжилт үзүүлье гээд сэтгэл амралгүй хурцлаарай.

Энэ нь ганцхан удаагийн процесс биш бөгөөд цаашид тасралтгүй өрнөх үйл явц тул үүнийг хүлээн зөвшөөрч, цаашид илүү системжүүлэхэд анхаараарай.

ТУЗ бол таньтай нэг баг бөгөөд таны олж хараагүй сул болон давуу талуудыг олж харж, хамгийн эмзэг цэгийг тань сануулах чадвар, туршлага дүүрэн мэргэжилтнүүдийн нэгдэл гэдгийг санаад үг бүрийг нь ажлаа илүү сайжруулахад ашиглаарай.Батжа нь зөвлөлөө шүү 😉

Хамгийн чухлыг нь хамгийн сүүлд нь гэгчээр ТУЗ гишүүдтэйгээ хурлаас өмнө нэг бүрчлэн уулзаж, хоолонд орж эсвэл кофе уунгаа тайлан болон төлөвлөгөөгөө танилцуулчихаарай. Үгүй бол хурал дээр бөөн гэнэтийн бэлгүүд задрах, хүссэн үр дүн дэмжлэгээ авч чадахгүй байх эрсдэл үүсдэг шүү.

Танд амжилт хүсье.

‍